gescht hani DRS3 gloost, so schoen widr mol schwitzerduetsch z'ghoehre, do redi und hoehr zwar viel duetsch aber immer numme hochduetsch oder schriftduetsch oder wie me daem au immer seit.

Jetz hani grad zwei Stunde Comercio Exterior gha. DProfessorin betont immer das me bi ihre keini notitze mache muessi will alles im skript stoht, sowit sehr guet. Aber drfruer diktiert si umso lieber sache. Haen jetz grad 2 Stunde Spanischdiktat gha, oke fuer mi spanisch sicher nit schlaecht, aber irgendwie chunnt me sich komisch vor. Choennt doch ds Zueg eifach uffs netz tue oder usteile... naja

Morn gitz Streik do. Waege Bologna, jetz weiss niemer ob morn Uni isch oder nit. Irgendwie gitz anschienend sone system das dStudis vo de Vorlaesige choenne abstimme ob si dVorlaesig waenn oder nit (?), has nit ganz begriffe. Jedefalls haen si huet scho ummegschraue und Laerm gmacht waerend de Vorlaesige und ueberall haenge baskischi Plakat vo anschienend zum kampf uffruefe... was au immer das heisst. Cha no z'wenig baskisch zum so inhalt z'verstoh.

Morn zoobe/znacht gitz anschienend e Mister und Miss Erasmus Wahl do, im Bataplan (unter Spanier bekannt als Buscaplan). Vilicht gangi mol go luege ;-) choennt no luschtig si.

Am Frittig zoobe gangi denn nach Barca, juhuuu *freu* Nach mine letschte Informatione choemme Silli und Jessi, Jivi und Reto. Mol luege obi no cha Usgehtipps ufftriibe :-)

liebi gruess in di schoeni schwitz!
Nora

Oke us em spezielle Alass, das ich jetz Internet deheim ha (Gott het sWireless vom nochber widr umgleitet ;-) ) gitz jetz Föteli vo mine WG Mitbewohner, äxtra die beschte föteli woni ha!!

Philippe:


Susann:


und zum vervollständige no e tolls vo mir:


Musu

das sin biskischi Naeme. sin si nit wunderschoen? me gwoent sich aber mit dr zit drah... am afang hani no nach em dritte mol nochefrooge muesse uffgeh und eifach gseiht "Ahh" und e verstehends gsicht gmacht (hihi wie bim Jivan *erinner*) aber mittlerwiile kenni dnaeme und si wiederhole sich au zimmlich oft... me gwoehnt sich jo an alles ;-)

Huet isch e krasse Uni-Tag...vom 11i (aso eigentlich vom 10i aber das hani verschoobe) bis am 8i zoobe uni). Vo 11-12 Economia Española y mundial, momentan monetaers system vo dr EU, verstand grad nit so viel im momaent. Denn hani grad 2 Stund comercio exterior gha und dProfessorin isch vo ihrem Podescht abegheit... nei het sich nit wehgmacht, doerfsch unghemmt lache ;-). Schreeg ploetzlich kippt si nach vorne um und verschwindet hinter de bankreihe!
Jup und am 4i hani 2 Stund Spanisch... causal und consekutivsaetz. und denn no 2 stund baskisch: nik liburua dut= ich ha e buech!
Denn heim, aesse und denn go Jazzsession lose/luege und kalimotxo trinke. Das isch mi Tag huet.

Am morge bini no binere Bank gsi go frooge ob ich e Konto cha uffmache.... wiiiilll ich ha naemlich kei Pass. und fuer do e Konto uffmache bruch ich e Pass will ich nit EU bi. Grummel. Jetz muesi morn nomol verbigo zum luege ob si irgendwo e spezialabkomme finde mit dr Schwitz, waer jo immerhin moeglich.

Uuund :-) gescht hani s'erschte Wienachtsgschaenggli gchauft :-D
Im lidl verkaufe si schliesslich au scho Schoggisantichlaeus.

Aguuuuur

Liebs Tagebuech,

hüt hani bitz öbbis über Belgie glernt. Ich bi schockiert, ha dänkt das sig so ähnlich wie in dr Schwitz. Aber nei, sSystem dört schiint nit würkich z'funktionniere. Dr Philippe het verzellt, das in vielne Fäll dUsländer de Belgier vorzoge wärde. Zum Bischpiel gitz so Wartelischte für Sozialwohnige. DUsländer wärde offesichtlich grad scho vo afang ah obe uff dLischte gsetzt.
Usserdäm isch dPolizei anschienend zimlich überforderet. Zum Teil wenns Schlägereie gäb wür dPolizei nit igriffe will si sälber Angscht hänn... Offesichtlich hän si Problem mit Türke wos ganz vieli heig dört und dStadt regiere... meh als dPolizei.

Het mer e Gschicht verzellt vo eimol wo si in Usgang sin (Achtung die Dütsche luege di komisch ah wenn du frogsch ob si gescht im Usgang gsi sige! Ussgang isch dört lediglich dTüre zum usegoh. das numme so als Ischub). Jedefall sin si mit öbbe 15 Fründe in sone House-Schuppe. Wo si ihne cho sin hänn sich mol alli zu ihne umdreiht, alles Johnnies und Mari-irgendöbbis. Das isch anschienend sone bitz stress-suechendi, house-losendi, tuned-cars fahrendi gsellschaftschicht. Isch denn e biz e agspannti Situation gsi und numme dHälfti het welle bliibe. Die andere sin zumene Kolleg heim. Nach öbbe 2 Stund bechömme si e Telefon vo de anderne: "Chönned ihr uns bitte cho hohle? Mir renne grad do durch dStrosse vor däne Johnnies drvo, hänn uns müesse uffteile. Chömmed mit em Auto!" (o.ä.). Anschienend hänn jetz die andere zersch dSecuritas verprüglet und sinn denn mit em ganze Pulk uff die 7-8 Lüt loos wo no dört gsi sin. Die sinn denn drvogrennt und vo de anderne mit Autos und Mofas verfolgt worde. Drumm hänn si sich denn uffteilt. Zwei sin anschiinend in e Sackgass groote und 4 vo de anderne hintedrii. Sinn voll verprüglet worde. Denn het anschiinend eine vo de Johnnies gfunde: "So gnueg jetz, die hän uns jo gar nüt gmacht." Denn hänn si dä eifach au verprüglet...

Und dGfängnis sin voll, d.h. dStroofe wärde däm apasst und de Beteiligte! Anschiinend het e Kidnapper läbenslang becho wo dr Sohn vomene riiche (mitm Königshuus befründete) Typ kidnapped het (vor e paar Johr). Und eine wo e Polizischt umbrocht het 6.

Im flämische Teil vo Belgie gitz anschiinend e Partei ultra-rächts aber relativ stark (ca. 25%? ). Die andere Parteie hän aber beschlosse di Partei vo dr Regierig uszschliesse. D.h. si gwünne immer meh Stimme aber si chönne nit mitentscheide. Cha me das no Demokratie nenne?
Guet alli informatione ohne gewähr, müesst meh über sBelgische Regierigssystem wüsse zum das beurteile, aber schiint mer scho bitz undemokratisch z'si!

Nach diverse Ufforderige und nochfrooge ob ich ächt no läbi, glaubi, ich mues doch widr mol öbbis do ihneschriebe.

Mi internet deheim isch leider widr wäg. Das heisst für mi ich mues sWirelessnetz vom "kulturhuus" nutze, was wiederum heisst ich sitz grad im park vorem kulturhuus und schrib do fröhlich vor mi ahne. dLüt luege nit komisch, nei, aber ich bi mers jo gwöhnt. Wenn ich und dSuse mit unserne sexy surfsuits durch dStroose laufe (zum strand wohlgemerkt.. nit eifach so ohni grund!!) starre dLüt eim zum teil au ah. VIlich mues ich no drzuesaage dases do durchus nüt speziells isch wenn me type in surfsuits seht laufens, radelnd oder mofafahrend. Aber das sin halt type und keini mädels. blödi spanier!
blödi spanier, guets stichwort. Si hän mer nämlich au mit Velo gchlaut! und dank däne rateros hani denn au bekanntschaft mit dr polizei gmacht (ha müesse e azeig mache wäg dr versicherig).. peinlich ha nümme gwüsst wies genau ussgseh het. ha gmeint sig silbrig, aber naja dhälfti isch blau, hani denn i nochinein gmerkt (het do dutzendi vo däne velos, wills sbilligscht modäll isch im nögschte sportichaufszentrum.

Uni: gescht hämmer müesse matlab-code abtipe, vo dr tafele... uuuuh, aspruchsvoll!
und die nätti vorläsig wommer täglich 1 stund hän und vo däre stund 30 min läse (e wunder das nit öbber mues lut vorläse) und denn verzellt dr prof nomol was mer gläse hän... super! (aso nit das ich in däne 30 min dä text chönnt läse wo me denn mues läse, aber bitz öbbis meh uni-stilischs wär doch kuhl)
Drfür machi jetz no e baskischkurs! sehr luschtig.. chunnt mer bitz vor wie elbisch oder hobbitsprooch.
"Mutil txikia" (sagemer em Philli immer), "zer moduz?" (frogezeiche numme am ändi vo dr froog, was für e komischi sprooch ;-) )

Was gitz susch no z'verzelle? kei bsuech me (für mi) sit mim schwöschterli (obwohl si doch so guet wärbig gmacht het!) jo isch halt tüür zum do ahne cho und choschtet zit dr billigscht wäg z'finde.
Dr Phill het mol bsuech gha vonere "kollegin". Irgend e Schwöschter vo dr Fründin vom brueder vo dr Fründin oder so. Het si vorhä ei mol gseh und si chunnt ihn für 4 täg go bsueche, hihi. Hän die ganz zit holländisch gredet.. wenn si langsam rede verstoht me eigentlich ganz vill, aber si rede natürlich nie langsam... aber ich ha scho paar sache glernt, bispielswiis: "Je ziet er goed uit!" oder "Bel me, alstublieft". Sache wo me im tägliche läbe halt so bruucht. sSpanisch het sich nonig chönne duuresetze in dr WG... obwol mi spanisch gläb einiges besser isch als mi änglisch.

dSpanier läbe uf dr stroos.. vor allem zwüsche 6 und 9... mit kind und kegel. und was macht me denn wenn kind plötzlich e bedürfnis het z'schisse? naja für was gitz au boim... (mhm, het grad e vater sini tochter näbe mi an baum schisse loh, aso an boode näbene baum...)

ui dzit rennt.. mues heim, am 7i muesi vorem mac sii. d Sue het mit em Iñigo abgmacht und ich dörf si begleite will är eigentlic hsco mit emene kolleg abgmacht het.. irgendwie so. über baskischi näme schribi denn e andersmol ;-)

vermiss euch!
Nora